العز للشهيد قصيد للشاعر عماد الزغلامي
العز للشـّهيد *
يا ريح شدْ صحيح في ثورتنا
وزيد هزْ تَحيِّتْنا
لْشهيدْنا وهنّيه بمْحبّتــــــــــنا
*يا ريح قول تكلّمْ
بنسايمك يا ريح عدّي سلّمْ
في الرّوح تسكن روح وانت تعلمْ
والرّوح صارت ريح من فرقتْنا
غدروه والقنّاص قلبو مظلّمْ
والدمْ فاض وسال يا ليعتنا
*يا أرض تحمل همّي
يا أمْ طول الدّهر ديمه تضمّي
يا قلب وسط الرّوح غسلك دمّي
عانقت فيك الحب حتى متنا
واليوم ما عدتيش باسمي تسمّي
ولا عادلي ما نزيد في حكايتنا
*قتلوك ذرّي عمّكْ
خلّوك في الكيّاس أحمر دمّك
مضروب بالكرطوش أسفل فمّك
مكتوب يا شهيد في ذمّتنا
مغسول بزغاريت دمعةْ أمّك
والثّار ديمه فرض في ذمّتنا
*هزّوك للجبّانه
على اكتاف كل النّاس في كتّانه
آلاف كانو معاك رفضو الهانه
على جمرتك ماشين في جنازتنا
بالرّوح زيد الدمْ نادو معانه
والعزْ للشّهيد في أمّتنا
*تبكيك عين اندادكْ
لحجار تبكي عليك في استشهادك
لشجار والاطيار،ارض اجدادك
والمدرسه والدّار حتى شوتنا
وفْراش نمت عليه زيد وسادك
ولمسات كانو حْنان في حومتنا
*دمّاع قلمك ذابل
يبكيك ها الحاسوب والبرطابل
وعليك سهم الواب ولّى هابل
وتناقلت لخبار ما داوتنا
مسحوق دمّك شاح صار قنابل
بارود فجّر نار في كذبتنا
*ضربوك فوق جْبينكْ
نيشان ملك الموت غمّض عينك
لاعاد في التشغيل حد يهينك
ولا عاد تطلب شغل من دولتنا
وارتحت من المسؤول عن تعيينك
ومن قول تعليمات هذي جتنا
*لاشهايدك نفّاعه
لاالحظ لاالمكتوب لاالوقّاعه
لكتاف هيّ الكل في ها السّاعه
بفلوس رشوه تنالها خدمتنا
ويجيك هاتف برق ع السمّاعه
ويقولك مطلوب في وزارتنا
*لايقول ارجع غدوه
موضوع ندرس فيه نعمل جدوى
بكلام رطب يذوب مثل الندوه
واعمار ضاعت ريح كي فاتتنا
ومقص قص الخيط وقت السّدوى
بالصبر مستنّين حتى متنا
*كبران يحكم فينا
بمليون غل وغل شدْ يدينا
من البوب والبوليس ياما كلينا
والقمع ليل نهار ما فلّتنا
عينين كل النّاس ديمه حزينه
لكن رغم القهر ما سكـّـتـْـنا
*على راسهم حجّامه
متعلمه التحجيم في ليتامه
وقعدات سهر اللّيل في العوّامه
في فرانسا وزوريخها رهنتنا
على فـّامنا عاملين لينا كمامه
واخواتها فيران في جرّتنا
*يا وليد نام ارتاح
مشموم عنبرفل دمّك فاح
مقواه صوت الحق لمّا صاح
طوفان طاف يلج من غربتنا
لكلاب هربت خوف دون نباح
على راسهم راييس فيه شمتنا
*يا أم ما تبكيش
والدمْ كيف الما ما يولّيش
شهيد ضحّى اليوم باش نعيش
والمجد للشّهيد في ثورتنا
هنّيه قلّو ارتاح ما تنسيش
يا أمْ ولد عاش ونحنا متنا
شعر :عماد الزّغلامي
