الممثل المصري شكري سرحان في احد الحوارات النادرة

أنوار جامعية / متابعات

المذيعة : لو جاتلك تذكرة سفر هدية اكتب البلد الذي تحب السفر إليه … ولماذا ؟

شكري : والله ان الحقيقة و بكل صراحة أمام الله إن أنا بحلم بإني أرجع اروح الكعبة تاني و احج تاني ، دى عندي أمنية و اسأل الله أن يهديهاني فعلا السنة الجاية ان شاءالله .

المذيعة : شيك على بياض .. اكتب المبلغ و هتصرفه ف ايه ؟

شكري : مليارات النقد العربي للبوسنة و الهرسك .

المذيعة : يوم في حياتك لن تنساه ابداً ؟

شكري : والله ايام كتير الحقيقة بس بردوا احب أدى حاجة يعني من حياتي الخاصة .. ان انا يوم ما اتجوزت كان يوم بالنسبالي ليه مفعول السحر بالنسبالي انا ليه ؟ لإني انا قعدت كام سنة من غير ما اتجوز و طبعا مكنتش قديس مع الاسف يعني فا ماصدقت ان انا حسيت حلاوة الحب الصادق الحب اللى هو بقى حب الزوجة و الحياة الطاهرة المطهرة .

المذيعة : لو قُدِر لك ان تعيش في الماضي .. مَن مِن الشخصيات التاريخية تختار ان تكون و لماذا ؟

شكري : اصل انا لو هقولك هقولك مين ولا مين يعني اقولك مين من اول الرسول عليه الصلاة و السلام و سيدنا ابو بكر و سيدنا عمر و سيدنا على بن ابي طالب و عثمان بن عفان و الخلفاء الراشدين ولا اقلك شخصية عمر بن عبد العزيز و دى شخصية انا قريت انها بتتمثل حاليا و انا ادعو للناس اللى بيعملوها انهم يطلعوا عمر بن عبدالعزيز كما هو لانه شخصية مضيئة مضيئة إلى اقصى حد و رجل كان ثري جدا قمة الثراء و الشفافية و الرفاهية و بعدين لبس الخيش فا دور عظيم

المذيعة : لو قُدِر لك ان تعيش في الماضي مَن مِن الشخصيات التاريخية النسائية تختار ان تتزوج و لماذا ؟

شكري : اقولك مين ولا مين و لا مين .. اقولك مثلا مش عايز اطلب شخصيات يعنى فيها حرج إني اتكلم عنها بس اسيب اللى فيهم حرج بقى إنما يعني اقلك مثلا اسماء بنت ابي بكر اللى جالها ابنها يقولها انا هأُهزَم ولما أُهزَم هيقطعوني .. تقوم تقولوا وما يضير الشاة سلخها بعد ذبحها و تدفعوه إلى القتال و هى تعلم أنه هيُقتَل و بعدين يُقتَل و فعلا يمثل بيه و يترفع مصلوب ٣ ايام و هى ام تروح و ما تبكيش .. تقف و تبص و تقول اما آن لهذا الفارس أن يترجل .

المذيعة : استاذ شكري احنا في نهاية لقائنا سعداء جدا بوجودك معانا و بالكلام اللى حضرتك قولتهولنا و دلوقت بنسألك سؤالنا المعتاد .. الفنان شكرى سرحان .. من انت ؟

شكري : انا ابن الأرض العربية .. ابن مصر العربية .. احد امة لا إله إلا الله و هذا شرف كبير ليا و ادعو الله ان انا اكون جدير بأن تُعطى لي و تطلق علي هذه المسميات إللى انا قولتها 

 L-univers

L-univers

Journal électronique traitant des affaires étudiantes, de la vie universitaire, des services universitaires et des activités communautaires

Shopping Basket